Previa SD Piloño-CD Baio

A Historia

O domingo o CD Baio ten que viaxar ata Vila de Cruces para xogar no campo do Camballón contra a SD Piloño, equipo fundado en 1996, e do que non imos repetir a súa historia, que podedes ver na previa do partido da primeira volta.

Tan só dicir que esta é a quinta temporada que coinciden os dous conxuntos na mesma categoría e grupo, todas elas na Primeira Autonómica semiprovincial (ou supraprovincial neste caso). O primeiro partido dos dous conxuntos no Camballón foi o 27 de abril de 2014, e nel o Baio impúxose por 1-2. Na seguinte visita, da temporada 2014-15 o Piloño impúxose claramente (3-0), e tamén gañaría na 2015-16 por 2-0, con dous goles nos últimos minutos. A última visita a terras cruceñas do CD Baio foi a campaña pasada, e nela o cadro baiés logrou unha importante vitoria (0-3) na súa loita pora evitar o descenso. Polo tanto, dos catro enfrontamentos repártense as vitorias entre os dous conxuntos (cinco goles a favor do Baio e seis a favor do Piloño, para desfacer a igualdade). Nas estatísticas xerais, o Baio é lixeiramente superior, pois suma 4 vitorias nos nove partidos, con dous empates e tres derrotas; leva 12 goles a favor e 15 en contra.

O partido do domingo

A SD Piloño era un dos equipos chamados a loitar polo título, máis polo bo traballo feito en temporadas anteriores que por manexar altos presupostos como pode ser o caso do Sigüeiro ou Flavia. Mais un inicio complicado de temporada, con moitas lesións fixeron que quedase descolgado dos postos cabeceiros, pero pouco a pouco vaise achegando e colleitando resultados ao nivel do esperado. A vitoria da pasada semana no Souto así o testemuña. O bloque de xogadores é similar ao da temporada pasada, pois as incorporacións eran poucas: o gardameta Caramés, que chegou da EF Lalín (e que xa causou baixa pois foise para o Cire Melide), o veterano Senra, e os tamén novos Manuel García (Cruces) e Martín Taboada (EF Lalín). Coas baixas lograron recuperar a Matías e Iván Fernández, para contar na actualidade con 21 fichas dispoñibles. E son 21 os xogadores que fixo xogar no que vai de campaña o míster Julio Alberto, e tan só Martín Taboada o fixo en todos os partidos (e en todos titular). Un partido menos xogaron Marc, Zequi e Manuel García, aínda que mentres que o veterano Marc foi titular en todos eles, os outros dous fórono en 13 deles. Son case sempre fixos na aliñación o porteiro Álex (sobre todo logo da marcha de Caramés na xª.9), Otero, Juan, Santi, Imanol e Dani Méndez. Moitos partidos desde o inicio levan tamén Dani ou Tuco, mentres que homes como Pablo ou Víctor reparten as súas aparicións entre a titularidade e a suplencia. Menos minutos acumulan de momento, aínda que non é por falta de calidade, os Maceiro, Romero, Javi López, Terri, Senra ou o recuperado Matías.

Na actualidade ocupa o 6º posto, con 31 puntos, logrados mediante oito vitorias (Esclavitud 0-4, Flavia 4-0, Soneira 1-0, Val do Ulla 1-3, Bertamiráns 3-5, Chaián 1-0, Praíña 1-0 e Flavia 0-1) e sete empates (na casa, Fisterra 1-1, Tordoia 0-0, Unión 0-0, Lalín 2-2 e Esclavitud 2-2; fóra, Esteirana 0-0 e Fisterra 1-1), e perdeu cinco partidos (Baio 2-1, Sigüeiro 2-0, Cordeiro 0-1, Bastavales 2-1 e Dumbría 2-0). Son pois 17 os puntos que logrou como local, polos 14 como visitante, cos mesmos encontros xogados como local e como visitante, e quizais na pouca bagaxe de puntos que leva no Camballón para o que era habitual neste equipo faga que non estea nos postos altos da táboa. En dez encontros tan só catro vitorias é algo estraño no Piloño, e se miramos os últimos partidos vemos dous empates contra Lalín e Esclavitud, que chegaron despois de dúas vitorias pola mínima contra equipos da parte baixa (Chaián e Praíña). Mais analizando o potencial deste equipo vemos que logrou gañarlle os dous partidos ao Flavia (o único que venceu no Souto) e empatar os dous co Fisterra, ou sacar catro puntos contra o Esclavitud. Outro dato que destaca está no aspecto goleador, pois marca e recibe máis goles como visitante que no Camballón, onde só lle marcaron sete dos 20 que leva en contra, mentres que marcou 13 dos 29 que suma a favor. O seu máximo goleador é Dani Méndez, con 8 goles, seguido por Martín Taboada, con 7; Víctor suma 5; con 3 están Marc e Manuel García; e completan con 1 gol Terri, Zequi e Imanol.

PRIMEIRA GALICIA – GRUPO 2

S.D. PILOÑO – C.D. BAIO

Domingo 3 de febreiro; 18:15 horas.

Saída de Baio ás 15:30 horas.

Campo: O Camballón (Vila de Cruces).

Árbitro: Manuel Castro Mouzo.

Asistentes: Santiago Boedo Varela / Sergio García Otero.