Previa: Praíña Sp. C. – C.D. Baio

Principia unha nova temporada para o CD Baio, a 56ª da súa historia e a 14ª na 1ª Autonómica. E comeza coa ilusión de mellorar o feito a campaña anterior, na que o sufrimento polos posibles arrastres foi unha constante nas últimas xornadas, pero finalmente o equipo deu un paso adiante e rematouse nun tranquilizador 11º posto. Novas caras para este ano que comeza, coa chegada dun novo míster, Pablo Torreira, e seis fichaxes: Álex (Tordoia), Damián (San Tirso) e Pablo (Nantón), aos que se suman Julián, Regueira e Sergio, que soben desde o equipo xuvenil. E na primeira xornada terán enfronte ao Praíña Sp. C., rival que acaba de ascender por vez primeira á categoría provincial, polo que vai ser o primeiro enfrontamento na historia dos dous clubs.

O Praíña Sporting Club fundouse en 1970 en Pontevea (Teo) e desde entón non deixou de competir nas 49 temporadas que acumula coa actual. Principiou a súa andaina na campaña 1970-71 na 2ª categoría da Liga do Sar, na que estivo catro temporadas, proclamándose campión a última delas (1973-74). Ao ano seguinte xa se crearon as categorías tal e como as coñecemos hoxe en día, e o Praíña foi incluído dentro da 2ª Rexional, na que estivo dúas campañas antes de descender á 3ª Rexional. Cinco temporadas despois proclámase campión (1980-81) e volve á 2ª, na que bota tres anos consecutivos. Tan só dous anos na 3ª e novo ascenso á 2ª, na que logra aguantar 6 temporadas. Catro campañas na 3ª Rexional, con dous títulos: na 1993-94 (non ascende) e 1995-96. Apenas bota dous anos na 2ª Rexional e volta á 3ª, na que quedará nada menos que oito temporadas, ata que na 2005-06 se proclama de novo campión. Novamente só bota dous anos na 2ª e retorna á 3ª, na que tras cinco campañas e un novo título na 2012-13 regresa á 2ª Autonómica. Aquí estivo tamén cinco temporadas, tras as que por fin conseguiu o ascenso á 1ª Autonómica. Estivo a piques de logralo na 2016-17, na que se proclamou subcampión, pero non o conseguiu na liguiña de ascenso, pero si que o fixo na 2017-18 co título de campión. En definitiva, o Praíña é un equipo que, tras os seus inicios na Liga do Sar (4 temporadas na 2ª categoría), estivo alternando a 2ª Rexional (20 temporadas) coa 3ª Rexional (24 temporadas), para acadar o histórico ascenso á 1ª Galicia. Un título da 2ª da Liga do Sar, 5 da 3ª Rexional e outro da 2ª Rexional son a bagaxe en forma de trofeos.

O equipo que vai atopar enfronte o Baio nesta xornada é bastante similar ao da temporada pasada, pois mantén o bloque con xogadores como Luis, Román, Marcos, Álex López, Ibán, Diego Salgueiro, Pegaso, Tito, Álex Touceda ou o goleador Lucas (ex do San Marcos, Estudiantil e Sigüeiro, e pichichi do Grupo 5 da 2ª Rexional o ano pasado con 34 goles). As baixas de xogadores como Breixo, Hugo, Melgarejo, Javi Touceda ou Solla foron cubertas con ata oito fichaxes: o porteiro ex do Villestro Vicente Caneda, do Bastavales chegou Toni, do Estradense Gato, o veterano Fafu volve á que foi a súa casa, Borja Bosinwa chega do Chaián, dous rapaces novos, Róber e Adrián Ferreiro, do xuvenil do Conxo, e Javi Sánchez vén do San Mamed. Todos eles quererán dar unha boa impresión no seu debut na categoría, e adaptarse pronto a unha categoría que se antolla esta temporada máis complicada que sempre, na que non hai un claro favorito por arriba (aínda que as quinielas aposten polo superreforzado Sigüeiro, sen esquecer o Piloño, Dumbría, Flavia, Lalín, Soneira, Fisterra, etc.) e na que por abaixo poden caer moitos ao pozo polos posibles arrastres, xa que na Preferente hai bastantes equipos desta zona.

PRAÍÑA SP. C. – C.D. BAIO

Domingo 2 de setembro, 19:00 horas

Campo: Municipal Juan Amado (Reis-Pontevea)

Árbitro: Miguel Ángel Vilas Lorenzo

Asistentes: Mario Sanín Seoane / Sergio García Otero.