Previa CD Baio-Flavia SD

A Historia

O domingo o CD Baio recibe no Platas Reinoso a un clásico do fútbol galego, o Flavia SD; club fundado en 1964, tras varias denominacións en 1979 adoptou a actual, e con ela converteuse nun dos clubs galegos máis destacados: 9 temporadas na 3ª División e 16 na Preferente así o testemuñan. Non imos repetir o seu historial porque xa o fixemos na primeira volta, simplemente temos que recordar os seus títulos para ver a magnitude desta institución. No seu palmarés figuran unha liga de Preferente (1984-85), outra de 1ª Rexional (2003-04) e tres Ligas do Sar (1967-68, 1969-70 e 2002-03); pero onde destacou foi na Copa do Sar, xa que é o club con máis títulos, nada menos que oito (67-68, 77-78, 78-79, 03-04, 06-07, 07-08, 14-15 e 15-16).

Esta é a undécima temporada que coinciden os dous conxuntos, as tres primeiras na Rexional Preferente e as demais na 1ª Rexional. O primeiro enfrontamento entre eles tivo lugar o 9 de setembro de 1984, en Padrón, con vitoria local, mentres que o primeiro partido que disputaron en Baio foi o 20 de xaneiro de 1985, e nel o Flavia volveuse impor por 1-3 -o conxunto padronés ascendería á 3ª División, da que acababa de baixar-. A seguinte confrontación foi na temporada 1988-89, e no Balsiño produciuse un empate (1-1); e a terceira na Preferente foi na campaña 1996-97, e aquí gañou o Baio, xa no Platas Reinoso, por 2-1. Os tres seguintes enfrontamentos foron na 1ª Rexional provincial, e as tres consecutivas: na 1999-2000 gañou o Baio (2-0), na 2000-01 volveu gañar o Baio (1-0) e na 2001-02 impúxose o Flavia (0-1). Haberá que esperar ata a campaña 2013-14 para que se volvesen atopar, na 1ª Autonómica semiprovincial, e novamente serían tres temporadas seguidas: nesa primeira gañou o Baio (2-1), ao igual que na seguinte (2-0), mentres que os padroneses se impuxeron na terceira (0-3). A última visita tivo lugar a temporada pasada, a 2017-18, e o partido xogado en Baio rematou con empate (1-1). Xa que logo, as estatísticas mostran uns datos favorables ao Baio nos encontros disputados como local, con cinco vitorias e dous empates nos dez encontros (12 goles a favor e 11 en contra); mentres que as estatísticas xerais amosan unha maior igualdade, pois os dous suman cadansúas oito vitorias, ás que hai que sumar cinco empates (o Baio marcou 23 goles e o Flavia 29).

O partido do domingo

O Flavia SD está demostrando un ano máis que se trata dun conxunto temible, e esta temporada está loitando por un título que se está poñendo excesivamente caro. Reforzárase o conxunto padronés no verán con xente moi nova, para dar o contrapunto a varios veteranos que formaban no seu conxunto, e no transcurso da campaña viñeron novas incorporacións de calidade como son o dianteiro Uxío (Negreira) e o veterano centrocampista Chiño (Xuv. Cambados). Pero a base do equipo segue estando nos de sempre, nos Perol, Triñanes, Checho, Padín, Álex Pérez, Víctor… Conta Camilo Perol actualmente con 19 fichas sénior, aínda que duranta a temporada xa utilizou 23 xogadores (pois tivo 4 baixas, porque non conta con equipo xuvenil). Tan só dous xogaores participaron en todos os partidos de liga, David Triñanes e Carlos Padín, aínda que este foi suplente nun deles. Nun partido menos participaron o porteiro Diego Perol e Álex Pérez (este tres veces desde o banco); e xunto a eles son fixos no once os Víctor, Andrés Seijas, David Pérez ou Checho, ao igual que o foi Uxío desde que chegou. Bo número de veces apareceu de saída tamén Óscar, ao igual que Jesús; Salva Arufe e Jorge Rama combinaron as súas aparicións no once coa saída desde o banco; e desde aquí saen habitualmente os Damián, Kevin, Marcos ou Jorge Martínez. Diego Busto só xogou un partido na portería e Chiño leva un mes no equipo combinado titularidades con suplencias.

Na actualidade ocupa o 3º posto, con 62 puntos, logrados mediante dezanove vitorias (Fisterra 1-2, Soneira 3-0, Cordeiro 3-1, Chaián 3-1, Praíña 0-3, Dumbría 4-0, Esclavitud 1-2, Baio 3-0, Val do Ulla 4-0, Esteirana 4-0, Bastavales 1-3, Lalín 1-2, Fisterra 2-0, Soneira 2-3, Tordoia 2-1, Unión 3-1, Praíña 3-1, Dumbría 0-2 e Esclavitud 5-0) e cinco empates (na casa, Lalín 1-1; fóra, Sigüeiro 1-1, Bertamiráns 1-1, Cordeiro 2-2 e Chaián 0-0), e perdeu catro partidos (Piloño 4-0, Tordoia 1-0, Unión 2-1 e Piloño 0-1). Como visitante sumou 25 puntos dos 62, con 7 vitorias, 4 empates e 3 derrotas. Marcou 22 goles como visitante dos 62 que leva (é o máis goleador do grupo), mentres que fóra encaixou 17 dos 24 que suma en total. O Flavia leva oito xornadas sen perder (seis vitorias e dous empates), e de feito desde a xornada 7ª tan só perdeu un partido (na casa co Piloño). Nos seus 10 últimos partidos como visitante gañou sete e empatou tres. O seu máximo goleador é David Pérez, con 14 goles, seguido de Uxío, con 13, e completa o tridente dos Pérez, Álex Pérez, con 11 goles. O defensa Checho suma 6 e Padín 4, con 3 están Marcos e Óscar, con 2 Damián e Andrés Seijas, e con 1 Jorge Rama, Jesús, Chiño e outro máis en propia meta.

PRIMEIRA GALICIA – GRUPO 2

C.D. BAIO – FLAVIA S.D.

Domingo 7 de abril; 17:00 horas.

Campo: Platas Reinoso (Baio).

Árbitro: Marco Gil Soriano.

Asistentes: Genaro Gallo Escudero / Alejandro Fontenla Pérez.