Previa: Val do Ulla UD-CD Baio

A Historia

Na sexta xornada da Primeira Galicia o CD Baio viaxa ata Santa Cruz de Ribadulla para visitar ao Val do Ulla UD. Despois da desaparición nos primeiros anos desta década de dous históricos como o At. Ponte Ulla e o Airiños do Ulla (este xa fusionado co Boqueixón había varios anos), fundouse nesta parroquia vedrense un novo club, o Val do Ulla Unión Deportiva. Comezou a competir na temporada 2007-08 na 3ª Autonómica, categoría na que estivo tres campañas, ata que o subcampionato da campaña 2009-10 lle valeu o ascenso á 2ª Autonómica. Aquí estivo tres campañas nos postos medio-altos, pero na 2013-14 foi subcampión do seu grupo e xogou a liga de ascenso contra o Sofán e o Slávora, e pola golaveraxe non logrou ascender en beneficio do Sofán. Si o logrou na temporada 2014-15 na que se proclamou campión de liga e ascendeu á 1ª Autonómica Grupo II. Boa temporada nesta categoría na 2015-16, na que rematou cuarto, pero o 14º posto colleitado na 2016-17 supuxo o seu descenso polos arrastres. A temporada pasada, a 2017-18, volveu proclamarse campión e de novo subiu á 1ª Galicia, na que está competindo este ano. En total, son 12 as temporadas que leva en competición, con tres delas na 3ª Autonómica, seis na 2ª Autonómica e esta é a terceira na 1ª Autonómica semiprovincial. Os seus títulos son os dous campionatos ligueiros da 2ª Autonómica (2014-15 e 2017-18).

Esta é a segunda temporada na que coinciden os dous conxuntos, as dúas na 1ª Autonómica. A primeira foi na temporada 2015-16, e o 25 de outubro de 2015 o equipo vedrense visitaba o Platas Reinoso, con vitoria visitante por 0-1. O partido disputado no Coto tivo lugar o 28 de febreiro de 2016 e o Val do Ulla volveu gañar por un contundente 4-0. Polo tanto, o Baio non logrou non só puntuar senón que non puido nin marcarlle un gol ao equipo ullés.

O partido do domingo

Despois do ascenso logrado a temporada pasada, na que o Val do Ulla se impuxo ao veciño San Mamede, o cadro adestrado por Raviña mantén boa parte do plantel na presente. Con todo, destacan as baixas dos seus tres máximos goleadores como foron Capís (13), Daniel Nogueira (12) e Coria (10), que sumaron case a metade dos tantos logrados. Para paliar estas baixas chegaron catro fichaxes, como son Antonio Arnejo (Villestro), Sanín (Touro), Pepe Cidranes (Sigüeiro) e a volta de Cristian Ingelmo (Negreira); ademais de botar man do seu filial da 3ª Galicia (Julio Souto, Aldrey, Óscar López, Ezequiel, Gonzalo Hermida…). Ata o momento o técnico utilizou 19 xogadores, pero oito deles son fixos no once inicial, como o veterano porteiro Pedreira, xunto con Carlos, Álex Neira, Adrián Barrio, Franqueiro, Julio Souto, Ingelmo e Jaco. Para os outros tres postos usou a Martín Gómez e Magariños nos tres primeiros, pero logo foron entrando Gonzalo Hermida, Isma Estévez, Matew e o veterano dianteiro Pepe Cidranes. Nas cinco primeiras xornadas o Val do Ulla logrou sumar 8 puntos, conseguidos grazas a dous triunfos (Chaián 1-0 e Dumbría 4-2) e dous empates (Unión 0-0 e Esclavitud 2-2), mentres que só perdeu un (Praíña 2-1). Polo tanto, venceu nos seus dous encontros como local, sabedor do importante que é nesta liga facerse forte na casa. Leva oito goles a favor, e seis en contra, sendo Jaco o seu máximo goleador con 4 goles; con un están Carlos, Ingelmo, Gonzalo e Cidranes.

PRIMEIRA GALICIA – GRUPO 2

VAL DO ULLA U.D. – C.D. BAIO

Domingo 7 de outubro; 17:00 horas.

Saída de Baio ás 14:45 horas.

Campo: O Coto (Tomonde-Santa Cruz de Ribadulla).

Árbitro: Manuel Paz Hermida.

Asistentes: Óscar Couto Mendoza / José Luis Miguélez Granja.