Previa Cordeiro CF-CD Baio

A Historia

O CD Baio viaxa este domingo ata o concello de Valga para enfrontarse ao Cordeiro CF, club fundado en 1969, polo que cumpre na actual a súa 50ª temporada competindo. A pesar da súa condición de club pontevedrés, sempre disputou os campionatos encadrado na delegación de Santiago, polo que a Liga do Sar foi o seu espazo natural. Desas 50 campañas en competición, 16 temporadas son na 1ª Rexional (5 delas como Liga do Sar), 33 na 2ª Rexional e 1 na 3ª Rexional. Neste tempo conseguiu os campionatos de liga da 1ª Rexional Grupo 2A na 1987-88 (perdeu a promoción de ascenso á Preferente co Camariñas), e dous da 2ª Rexional (2004-05 e 2012-13).

Esta é a sétima temporada na que coinciden os dous conxuntos, todas elas na 1ª Rexional. O primeiro partido que disputaron foi o 8 de xaneiro de 1983, no Balsiño, e o Baio gañou con claridade (3-0); mentres que o primeiro xogado en Valga foi o 13 de maio de 1984, e volveu gañar o equipo baiés (1-2). Habería que agardar dúas décadas para que volvesen atoparse, e foi na temporada 2005-06, na 1ª Rexional Provincial, e o Baio volveu gañar en terras pontevedresas (0-2), mais ao remate os dous descenderían á 2ª Rexional. E os dous volveron subir logo da temporada 2012-13 e coincidirían nas tres campañas seguintes. Seguindo coa tradición, o Baio levou a vitoria do campo de Baño, tanto na 2013-14 (1-2) como na 2014-15 (0-2), para certificar a regra do 2. Foi nas dúas últimas visitas nas que o Cordeiro logrou impoñerse ao Baio: na temporada 2015-16 fíxoo por goleada (4-0) e na 2017-18 venceu por 2-0. As estatísticas dos partidos xogados en Valga son aínda favorables aos baieses, con catro vitorias e dúas derrotas, con igual número de goles (oito) para cada un; nas do total o Baio impúxose en 9 dos 13 partidos xogados, con tres derrotas e un empate; son 22 goles a favor e 14 os encaixados.

O partido do domingo

O Cordeiro CF leva unha temporada irregular, que fai que a estas alturas non teña aínda certificada a permanencia pola cantidade de arrastres que pode haber. O equipo reforzouse no verán con ata seis futbolistas novos, e mediada a temporada chegou desde o Negreira Samuel. O míster José Luis Gonzáles Eiras conta actualmente con 21 fichas sénior, e utilizou un total de 29 xogadores, oito deles xuvenís. Tan só un xogador, o xuvenil Manu Rivadulla, participou en todos os partidos da liga, e fíxoo ademais en todos como titular. Un partido menos xogou Manu, mais tres deles foron como suplentes. Xunto a eles podemos considerar fixo a Magariños, e despois tan só o porteiro Cascallar e Mateo superan os dous terzos dos encontros como titulares. Algo máis da metade dos encontros saíron no once Jonatan, Marcos Baldomero, Marcos Lorenzo e mesmo o xuvenil Iván. O dianteiro Antón era fixo ata lesionarse, e a fichaxe Samuel tamén o é desde que chegou. Outros xogadores que disputaron un bo número de encontros de saída foron Isaac, Rubén Bodaño, Moisés, Bustelo ou Yago. Con máis participación desde o banco están Rubén García, Juan Touriño, Lucas Ces, Pablo, Xenxo ou Anxo. Cinco xuvenís tiveron unha presenza case testemuñal, e outro deles, o porteiro Juan Busto chegou a xogar 8 partidos como titular.

Na actualidade ocupa o 12º posto, con 37 puntos, logrados mediante dez vitorias (Bertamiráns 2-1, Bastavales 2-0, Piloño 0-1, Unión 3-0, Praíña 3-1, Bertamiráns 1-2, Soneira 0-1, Tordoia 3-1, Piloño 6-1 e Esclavitud 1-3) e sete empates (na casa, Fisterra 1-1, Sigüeiro 0-0, Flavia 2-2 e Chaián 1-1; fóra, Lalín 1-1, Bastavales 1-1 e Praíña 0-0), e perdeu catorce partidos (Esteirana 2-1, Flavia 3-1, Soneira 0-1, Tordoia 3-2, Chaián 3-0, Dumbría 3-1, Esclavitud 1-2, Baio 5-1, Val do Ulla 3-2, Esteirana 0-1, Lalín 1-4, Fisterra 2-1, Unión 2-1 e Dumbría 0-1). Sumou 22 puntos como local por 15 como visitante, xogando un partido máis fóra; na casa gañou seis partidos e perdeu cinco, e conseguiu empatar catro, curiosamente contra os tres primeiros clasificados. Os seus últimos dous partidos como local non os conseguiu gañar, mais vén de impoñerse no difícil campo do Esclavitud. A súa clasificación complicouse cando mediada a liga só logrou unha vitoria en once partidos, o que o foi relegando a postos baixos, que sen chegar ao descenso directo si o ten colgando dos arrastres. Leva na liga un total de 44 goles a favor e 47 en contra, mais os seus números goleadores son mellores nos partidos xogados no Municipal de Baño, pois neles marcou 25 tantos e só encaixou 17. O seu máximo goleador é Manu, con 12 goles, seguido por Antón, que levaba 8 cando se lesionou xusto despois de xogar en Baio; levan 4 a nova fichaxe Samuel e Marcos Lorenzo, e 3 Jonatan e Moisés. Ata nove xogadores máis lograron marcar, iso si, un cada un: Isaac, Rivadulla, Magariños, Baldomero, Touriño, Bodaño, Lucas, Bustelo e Yago, ademais de outro marcado en propia meta por un rival.

PRIMEIRA GALICIA – GRUPO 2

CORDEIRO C.F. – C.D. BAIO

Domingo 5 de maio; 18:00 horas.

Saída de Baio ás 15:30 horas.

Campo: Municipal (Baño-Valga).

Árbitro: Carlos Villaverde Mogo.

Asistentes: Elisabet Brea Cumplido / Iria García Liste.