Previa CD Unión-CD Baio

A Historia

Na décimosexta xornada da Primeira Galicia o CD Baio viaxa ata o concello de Rianxo para enfrontarse ao CD Unión de Asados, club que foi fundado en 1969, e que disputa coa actual a súa 49ª temporada, logo de que se retirase na 1996-97. Tras once anos na Liga do Sar, ascende á 1ª Rexional na 1981-82, na que vai botar cinco temporadas, cumpridas elas ascende á Preferente, na que botará dúas campañas. Descende á 1ª Rexional na que se encadraba a Liga do Sar, na que está tres campañas para continuar na 1ª Rexional provincial as dúas seguintes. Descende á Liga do Sar e tras tres campañas baixa á 3ª Rexional, pero o club retírase nesa 1996-97. Volve competir na temporada 1997-98 na 3ª Rexional, e tras tres temporadas volve á Liga do Sar para a 2000-01, campaña na que queda campión, pero renuncia ao ascenso. Logo de tres temporadas máis, volve quedar campión na 2003-04 e agora si ascende á 1ª Rexional provincial. Cinco campañas botará nesta categoría para descender de novo á Liga do Sar, pero pouco duraría aquí pois proclámase campión nesa 2009-10 e regresa á 1ª Autonómica, e pouco duraría aquí porque acto seguido sobe á Preferente. A súa estancia aquí foi cousa dun ano, e volveu á 1ª Autonómica semiprovincial, na que acumula sete campañas consecutivas. Xa que logo, nesas 49 temporadas disputou tres ligas da 3ª Rexional, 23 da Liga do Sar, 3 da Preferente e esta é a súa 20ª campaña na 1ª Rexional. Nestes anos acumula 3 Ligas do Sar (2000-01, 2003-04 e 2009-10) e 1 Liga da 1ª Rexional semiprovincial (1985-86); así como 2 Copas do Sar (1974-75 e 1999-2000), sendo finalista tamén na 2007-08.

Esta será a décima temporada na que coincidan os dous conxuntos, dúas delas na Preferente e o resto na 1ª Rexional. O primeiro enfrontamento foi na 1ª Rexional semiprovincial o 16 de outubro de 1983, no Balsiño, con vitoria local (3-2), mesmo resultado para os locais que se deu no primeiro encontro xogado en Asados, o 11 de marzo de 1984. Os seguintes enfrontamentos serían na Preferente: na 1986-87 non houbo goles e na seguinte o Baio impoñeríase na súa visita a Asados (0-1). Houbo que agardar ata a campaña 2004-05 para que volvesen coincidir, neste caso na 1ª Rexional provincial, e o Unión impúxose por 3-1, pero na seguinte temporada o Baio gañou en terras barbanzanas (0-1). As seguintes veces foron na 1ª Autonómica semiprovincial, e nas tres primeiras impúxose o Unión: na 2013-14 por 4-1, na 2014-15 por 1-0 e na 2015-16 por 3-0; mentres que na última, na temporada 2017-18 acabaron en empate (0-0). As estatísticas, tanto as dos partidos xogados en Asados son favorables ao Unión, que gañou máis da metade dos partidos disputados (5 dos 9), con dous empates e dúas vitorias baiesas, e ademais os baieses apenas lograron marcar como visitantes, pois só foron quen de bater en 6 ocasións a meta rianxeira, por 14 goles recibidos nos nove partidos. Nas estatísticas xerais, o Unión gañou a metade dos 18 partidos, con catro empates e cinco triunfos baieses, con 33 marcados polo equipo de Asados e 18 polo de Baio.

O partido do domingo

O CD Unión mantense unha temporada máis na 1ª Galicia, e faino mantendo a regularidade que o caracteriza. Continúa co bloque do ano anterior con 13 xogadores dos 18 que compoñen o cadro do equipo sénior. Tan só algunhas baixas significativas, como as de Xavi Castiñeiras, Saviola, Bebeto ou Manuel Bouzas, e xa iniciada a temporada a de Jorge Martínez (Flavia). Cinco incorporacións sumaron calidade ao conxunto, como foron as do ex do Puebla, Jony, que estaba sen xogar, do Dubra chegou Villaverde, do Bertamiráns Pablo Souto, e desde o Araño incorporáronse Nacho e Eduardo Carou. Un total de 20 xogadores foron utilizados ata o momento polo míster, José Manuel Miguéns, dous deles xuvenís (o porteiro Sergio Romero e o dianteiro Ramos), e dos séniro aínda non debutou Pablo Souto e xa nos está Jorge Martínez. O único que estivo presente nas 15 xornadas foi Pablo Reboiras, aínda que só foi titular en 10 delas. O porteiro Eloy e Cristian foron da partida en 14 encontros, e os seguintes na lista de titularidades atopámolos con 11 veces: Óscar Blanco, Óscar Galbán, Villaverde e Ramos; mentres que con 10 están Nacho, Álex Conde e Chicho. Pero se algo destaca no conxunto rianxeiro é que a maioría dos xogadores pode ser titular, pois está moi repartidos os postos no once, e tamén calquera pode ser suplente.

Na actualidade ocupa o 10º posto, con 19 puntos, logrados mediante cinco vitorias (Esteirana 2-1, Lalín 1-0, Flavia 2-1, Tordoia 4-1 e Praíña 1-3) e catro empates (Val do Ulla 0-0 como local; e Bertamiráns 0-0, Piloño 1-1 e Esclavitud 0-0 como visitante), e perdeu seis partidos (Bastavales 2-1, Fisterra 3-0, Soneira 2-1, Cordeiro 3-0, Chaián 0-2 e Dumbría 1-2). Aínda que comezou ben sufriu un parón nas últimas xornadas, pois só sumou 5 dos últimos 18 puntos en xogo, o que fixo que baixase posicións na táboa. Aí chegaron as súas derrotas na casa, onde mantiña unha boa xeira e conseguía a maioría dos seus puntos, pois 13 dos 19 foron logrados no Municipal de Vilas. Ademias marcou como local 10 dos seu 16 goles e tan só encaixou 7, cando como visitante leva unha ducia. O seu máximo goleador é o xuvenil Ramos, con 4 goles; con 2 están Pablo Reboiras, Néstor e Mauro; e con 1 figuran Cristian, Villaverde, Óscar Galbán e Juanma, con outros dous en propia meta.

PRIMEIRA GALICIA – GRUPO 2

C.D. UNIÓN – C.D. BAIO

Domingo 16 de decembro; 16:30 horas.

Saída de Baio ás 14:00 horas

Campo: Municipal de Vilas (Asados-Rianxo).

Árbitro: Daniel Rodríguez Munín.

Asistentes: Bárbara Ana Álvarez Castro / Mateo Hermida Santos.