Previa CD Lalín-CD Baio

A Historia

Na vixésimoquinta xornada da Primeira Galicia o CD Baio recibe viaxa ata terras do Deza para xogar por vez primeira no Manuel Anxo Cortizo ante o C.D. Lalín. Fundado en 1974, o equipo lalinense converteuse nun dos clásicos do fútbol galego, polas súas moitas temporadas na 2ªB, a onde chegou grazas a un adestrador que daba os seus primeiros pasos, como Fernando Vázquez. A pesar do seu importante historial o CD Lalín non comezou a competir ata a temporada 1976-77, na 2ª Rexional, categoría na que botou tres temporadas. Tras un meteórico ascenso pasou á 1ª Rexional, á Preferente e á 3ª División en só tres anos. Desde a campaña 1981-82 á 2009-10 estivo ininterrompidamente en categoría nacional, combinando a 3ª División con algunha campañas na 2ª División B. Tras o descenso á Preferente e novo ascenso á 3ª División, chegou un novo descenso que mantivo o Lalín catro temporadas na Preferente ata que descendeu á 1ª Autonómica, categoría na que cumpre a segunda campaña consecutiva.

É esta, pois a súa 42ª temporada, que se dividen nas 3 iniciais na 2ª Rexional, 6 na 2ª División B, 24 na 3ª División, 6 na Preferente, e esta é a terceira na 1ª Autonómica. Temos que destacar que o CD Lalín figura na 10ª posición entre os clubs galegos que máis partidos xogaron na 3ª División, na que suma 912 encontros. Os seus títulos veñen dados de 2 ligas da 3ª División (1984-85 e 1990-91), 1 liga da Preferente (2010-11) e 1 liga da 2ª Rexional (1978-79), sumando ademais 7 fases de ascenso á 2ª División B.

O partido do domingo

A pesar de ser un dos grandes favoritos o CD Lalín non está obtendo os resultados agardados e ocupa neste momento a 8ª posición, con 39 puntos, a 15 do líder e a 12 do posto de promoción. Moi difícil vai telo para poder chegar aos postos cabeceiros nestas dez xornadas que faltan, agora que vén de encadear tres xornadas seguidas sen gañar. O troco de adestrador, coa marcha de Manu Cerón e a chegada dun clásico das cores lalinenses como Nando non reverteu a situación de momento. Ata un total de 20 xogadores sénior e varios xuvenís que puntualmente subiron ao primeiro equipo foron os empregados no que vai de temporada. Catro xogadores disputaron todas as xornadas: o defensa Nuno disputou todos os minutos, Richi e Brais tamén foron titulares todos os partidos, e Rubén só estivo unha vez no banco (na última xornada). Xunto a estes catro, son habituais no once inicial Ocampo, Xairo e Camba. Diego acabou sendo un fixo nas últimas xornadas e Xocas, logo da súa lesión, volve entrar nos onces. Na portería relévanse Marcos e Moncho, mentres que polos outros postos loitan os Matelo, Ferreiro, Rego, Pituso ou a recente fichaxe Agra. Do banco saen habitualmente Fer, Jorge ou o xuvenil Martín.

Como dixemos a oitava praza non colma as aspiracións do cadro lalinista, e nos 24 partidos só sumou 39 puntos, mercé a 11 vitorias e seis empates, con sete derrotas. No Cortizo só xogou 11 encontros, e aí sumou 20 puntos, con 6 triunfos (Ribeira, Unión, Bastavales, Soneira, Silleda e Chaián), 2 empates (Tordoia e Cordeiro) e 3 derrotas (Flavia, Agolada e Bertamiráns). É de destacar que o Lalín é o equipo máis goleador do grupo, pois leva nada menos que 52 goles, pero evidentemente tamén encaixa moitos (36 goles). Os goles repártense fundamentalmente entre tres homes: Richi (19 goles), Camba (16) -que son os máximos goleadores do grupo- e Brais (7). Os outros dez goles foron obra de Matelo (4), Petrabich e Rubén (2), e Ocampo e Pituso (1).

PRIMEIRA GALICIA – GRUPO 2

C.D. LALÍN – C.D. BAIO

Domingo 11 de marzo; 16:30 horas.

Saída de Baio ás 13:45 horas.

Campo: Anexo Manuel Anxo Cortizo (Lalín).

Árbitro: Roberto Couñago Ricón

Asistentes: Jorge García Pintos / Elisabet Brea Cumplido