Previa CD Baio-Sigüeiro FC

A Historia

Na quinta xornada da Primeira Galicia o CD Baio recibe no Platas Reinoso ao Sigüeiro FC. O club representativo do concello de Oroso disputa coa actual a súa 15ª temporada na 1ª Rexional, categoría máxima que disputou. O resto da súa traxectoria hai que situala na Liga do Sar e na 3ª Rexional. A primeira vez que competiu na 1ª Rexional foi na campaña 1984-85, na que foi subcampión do Grupo II, o que supón a súa mellor clasificación da súa historia. Repetiu na 1985-86 no mesmo grupo, para despois continuar as cinco seguintes no Grupo II-A, unha especie de Liga do Sar na 1ª Rexional. Xa con esta categoría cun único grupo provincial na temporada 1991-92 o Sigüeiro foi penúltimo e descendeu. Volvería á 1ª Rexional provincial na 2002-03, pero volveu descender nesa campaña. E as seis últimas temporadas, desde a 2013-14 ata a actualidade, participa na 1ª Autonómica semiprovincial. No seu palmarés figuran dúas Ligas da 2ª Rexional, nas temporadas 2001-02 e 2012-13, e dúas Copa do Sar, na 1996-97 (ao gañarlle ao Conxo, 1-0) e na pasada campaña, 2017-18 (gañoulle ao Laro, 5-2).

Esta é a sexta temporada na que coinciden os dous conxuntos, todas elas na 1ª Autonómica.  A primeira foi na temporada 2002-03, no Grupo I provincial;  o 15 de decembro de 2002, en Sigüeiro, o partido acabou con vitoria baiesa (1-3), mentres que o primeiro encontro en Baio foi o 27 de abril de 2003, e o equipo baiés goleou a un xa descendido Sigüeiro (8-2). Na temporada 2013-14 volveron coincidir despois de que os dous ascendesen na temporada anterior, e o Sigüeiro levou a vitoria de Baio (0-2). Moitos goles no enfrontamento da temporada 2014-15, con vitoria local (4-3), e nova vitoria do Baio (2-1) na temporada 2015-16 nun partido disputado no campo de San Andrés por obras no Platas Reinoso. A campaña pasada o Sigüeiro levou a vitoria do Platas Reinoso grazas a un solitario gol (0-1). Polo tanto, tres vitorias baiesas e dúas orosás nos cinco enfrontamentos disputados en Baio, mentres que as estatísticas xerais os datos favorecen ao cadro baiés, con seis vitorias, un empate e tres derrotas. 15 goles a favor e 9 en contra dos baieses no seu campo, mentres que as cifras xerais suman 25 a favor por 15 en contra.

O partido do domingo

Despois da irregular temporada pasada, na que o Sigüeiro FC, ao igual que o Baio, conseguiu afastar o fantasma do descenso nas últimas xornadas, esta campaña o equipo orosán cambiou por completo. Coa volta de Tomás Mougán ao banco do Sigüeiro, ata 12 xogadores abandonaron a disciplina do equipo, e chegaron nove xogadores, moitos deles con pasado recente na 3ª División. Para a defensa chegaron Juan Caneda (Dubra), Jacobo (Estudiantil; ex-Bertamiráns) e Ferreiro (Xuventude Oroso xuvenil); para o centro do campo, Íñigo (Ordes; ex-Bertamiráns), Juan Castro (Negreira; ex-Estradense, Bertamiráns, Ordes), Brais Rodríguez (Flavia; ex-Estudiantil, Bertarmiráns) e Calderón (Flavia; ex-Bertamiráns, Estudiantil, Grixoa); e para a dianteira viñeron Adán (Negreira; ex-Bertamiráns, Lalín, Santa Comba, Bergantiños…) e Astray (Negreira; ex-Estradense, Bertamiráns, Bergantiños). Nin que dicir ten que a conexión Tomás Mougán-Bertamiráns influíu nestas incorporacións. Xunto a eles continúan os porteiros Dani e Souto, e os Bautista, Aitor, Borja, Jesús, Chema, Álex Pri, Parcero ou a súa estrela, o veteranísimo Juanito. Unha mestura de veteranía e de xuventude nos 19 homes que compoñen o plantel, pero sobre todo prima a calidade, o que fixo que sumen por vitorias todos os seus partidos. Oito goles a favor e tan só un en contra nos encontros gañados ao Chaián (0-2), Praíña (1-0), Dumbría (1-3) e Esclavitud (2-0). O central Juan Caneda, con tres tantos, é o máximo goleador do equipo, o que dá mostra da importancia das xogadas a balón parado; con un gol están Brais, Astray, Adán e Parcero (un quinto foi en propia meta).

PRIMEIRA GALICIA – GRUPO 2

C.D. BAIO – SIGÜEIRO F.C.

Domingo 30 de setembro; 17:00 horas.

Campo: Platas Reinoso (Baio).

Árbitro: Brais Rosende Cancela.

Asistentes: Manuel Iglesias Bazarra / Aitor Escourido Álvarez