Previa CD Baio-SD Fisterra

A Historia

Na undécima xornada da Primeira Galicia o CD Baio recibe no Platas Reinoso a un gran coñecido, un veciño, e fonte inesgotable de xogadores -algúns deles triunfantes coa camisola branquiazul-, como é a SD Fisterra. O club fisterrán foi, coma o Baio, un dos fundadores da Liga da Costa, e desde esa temporada 1963-64, os fisterráns disputan coa actual a súa 52ª temporada, pois deixou de competir en catro campañas. Logo da súa fundación, o Fisterra compite en tres ligas da Costa, para retirarse na cuarta edición; volve na quinta, pero non disputará a sétima; de novo retorna na oitava, e dase de baixa na décima e undécima. A partir da 1974-75 xa competirá de xeito ininterrompido. As tres primeiras na Liga da Costa, para xogar na Preferente da 1977-78 á 1979-80. Por unha reforma das categorías logra o ascenso á 3ª División (é o segundo club da Costa que o logra, tras o Noia; despois virían Bergantiños, Malpica ou Santa Comba). Dous anos estivo en categoría nacional, para baixar para a Preferente na 1982-83, categoría na que estivo ata a 1987-88. As tres campañas seguintes estivo na Liga da Costa da 1ª Rexional, e as dúas seguintes na da 2ª Rexional. Na campaña 1993-93 volve xogar na 1ª Rexional provincial, categoría na que se mantería ata a temporada 1999-2000. Tras dous anos na Liga da Costa, volve xogar na 1ª Rexional provincial na 2002-03, pero volve para a liga costeira na que vai botar as seguintes nove campañas. Xoga na 2012-13 na 1ª Autonómica semiprovincial, pero xa volve descender para a seguinte a Liga da Costa, na que se mantivo ata que na 2015-16 logra o ascenso de novo á 1ª Autonómica na que milita por terceiro ano consecutivo. En definitiva, o Fisterra SD competiu dúas temporadas na 3ª División, 8 na Preferente, 29 na Liga da Costa e leva 13 na 1ª Autonómica. Nestes anos foi campión da Liga da Costa en catro ocasións (1976-77, 1992-93, 2001-02 e 2015-16) e tres veces da Copa da Costa (1978-79, 1996-97 e 2016-17), sendo ademais finalista deste trofeo nas campañas 1963-64, 1969-70, 1975-76, 1992-93 e 1997-98.

Esta será a vixesimosétima temporada na que coincidan os dous conxuntos, catro delas na Preferente, catro na 1ª Rexional provincial e o resto na Liga da Costa. O primeiro enfrontamento tivo lugar o 10 de maio de 1964 en terras fisterrás, con clara vitoria local (7-1), para xogarse o primeiro partido en Baio o 28 de xuño dese ano e con vitoria tamén local (1-0). Nas súas dúas seguintes visitas o Fisterra gañou no Balsiño (0-2 e 1-2), para empatar na seguinte que foi a 1967-68 (3-3). Despois virían catro triunfos consecutivos dos baieses (4-1, 10-2, 4-2 e 2-1) -o categórico 10-2 da temporada 1970-71 habíao devolver o Fisterra no Ara Solis na 75-76-. Nesta última e na seguinte os fisterráns marcharon cos puntos de Baio (1-3 e 2-3) para emprender o seu meteórico ascenso de categorías. Non volveron cadrar os dous equipos ata a 1984-85, na Preferente, con vitoria baiesa (2-1); nas dúas seguintes gañou o Fisterra (0-1 e 1-2), e na cuarta e definitiva nesta categoría volveu impoñerse o Baio (4-1). Na 1989-90 e 90-91 o Baio goleou na Liga da Costa da 1ª Rexional (5-0 e 4-0), igual que no primeiro enfrontamento da 1ª Rexional, que tivo lugar na 1994-95 (4-0); os dous seguintes anos que cadraron foi nesta categoría e o Baio volve vencer (1999-2000: 2-1 e 2002-03: 3-0). Os seguintes enfrontamentos foron na Liga da Costa, de xeito consecutivo desde a campaña 2006-07, na que gañou o Baio (2-0), un empate deuse na seguinte (1-1), e vitorias dos baieses nas tres seguintes (3-1, 2-0 e 2-0), para golear o Fisterra na 2011-12 (1-4). Tras uns aniños separados, na 2017-18 volveron cadrar na 1ª Autonómica e o partido disputado no Platas Reinoso rematou en empate (1-1). En definitiva, as estatísticas dos partidos xogados en campo baiés amosan que o Baio saíu vitorioso en case dous terzos das veces que se enfrontaron (16 das 26, con sete vitorias forasteiras), marcando o dobre de goles que o Fisterra (65 por 32). Se nos atemos aos enfrontamentos totais as estatísticas están máis igualadas, con 20 vitorias baiesas e 21 fisterrás, con 11 empates; o Baio logrou marcar 99 goles e o Fisterra 115.

O partido do domingo

A SD Fisterra mantén boa parte do bloque que disputou a temporada pasada, pero fixo ata nove incorporacións que lle deron un salto de calidade que o sitúan a día de hoxe como un dos mellores equipos do grupo. Os cambios comezan pola presenza de Ángel Canosa no banco, e na recuperación de moitos xogadores que volveron ao seu club de orixe, fundamentalmente desde o Dumbría. Son novidade entre as 24 fichas sénior coas que conta o club, Iván Bouzón, Julito, Aarón e Adrián Makaay (procedentes do Dumbría), Coté e David Marcote (Corcubión), o recuperado Adrián Castro e os xuvenís que subiron ao primeiro equipo, Dani Martínez e Gabriel Padín. O adestrador fisterrán usou no que vai de campionato 21 xogadores, todos eles sénior, destacando a Iván Bouzón e Andrés Vigo, que disputaron todos os minutos dos 10 partidos; Adrián Makaay e Pablo Lestón tamén xogaron nos 10 partidos, aínda que Pablo foi suplente nunha xornada. 9 veces titulares foron igualmente Rubia, Aarón e Roco, mentres que Julito, Roa e Bruno o foron en 8 ocasións. Estes dez xogadores poden considerarse fixos, logo, nas aliñacións fisterrás, mentres que Breixo, Coté, Fabián ou Dani Martínez reparten fundamentalmente a outra praza de titular. Algún destes tamén adoita saír do banco se non é da partida, ao igual que o fan Piti, Jesús, David Marcote, Mané, Edu, Gabriel Vigo ou Adrián Castro.

Na actualidade ocupa o 2º posto, con 21 puntos, logrados mediante seis vitorias (Soneira 0-1, Unión 3-0, Chaián 0-3, Praíña 3-1, Dumbría 1-2 e Esclavitud 3-1) e tres empates (Piloño 1-1, Tordoia 2-2 e Cordeiro 1-1), perdendo tan só un partido (Flavia 1-2). Acumula 8 xornadas sen perder e logrou a vitoria nos últimos 5 encontros. Suma máis puntos como visitante que como local, pois fóra do Ara Solis logrou 11 puntos, e tan só encaixou 3 dos 9 goles que recibiu. Tamén marca menos fóra da casa, 8 tantos dos 20 que leva na actualidade. O seu máximo goleador é Adrián Makaay, con 8 goles, seguido por Bruno, con 4, e Pablo Lestón, con 3; suman 1 gol Breixo, Julito, Aarón, Dani Martínez e Andrés Vigo.

PRIMEIRA GALICIA – GRUPO 2

C.D. BAIO – S.D. FISTERRA

Domingo 11 de novembro; 16:15 horas.

Campo: Platas Reinoso (Baio).

Árbitro: Sergio Bermúdez Seoane.

Asistentes: Genaro Gallo Escudero / Jairo Esmorís Lema.