Previa CD Baio-SD Esclavitud

A Historia

Volve o domingo o fútbol ao Platas Reinoso e recibiremos na vixésima xornada da Primeira Galicia á SD Esclavitud, equipo fundado na parroquia padronesa da Escravitude en 1968. Acaban de cumprirse 35 anos da primeira e única visita do equipo do Doce a Baio, pois foi o 11 de decembro de 1983 cando se disputou no Campo do Balsiño a única confrontación entre estes dous conxuntos, tamén na 1ª Rexional semiprovincial, e a vitoria foi para os baieses (4-1). Esta foi a única vitoria nos tres enfrontamentos entre os dous equipos, pois nos partidos xogados na Escravitude houbo un empate (1-1, na 1983-84) e unha derrota (2-0, no partido da primeira volta).

O partido do domingo

A SD Esclavitud está sorprendendo a todo o mundo coa gran campaña que está realizando, pois sendo un ascendido mantense durante toda a temporada nos postos altos da clasificación. E todo isto mantendo practicamente o bloque do ano anterior, con apenas fichaxes, destacando estas na portería, coa volta de Couso (Negreira), e as chegadas de Alexandre (Xuventú de Aguiño) e Sergio. Do Ordes B veu Estévez e do Boiro Xuvenil Miguel, e recentemente ficharon a Flori, o ex-gardameta do At. Ribeira que agora modificou de posición por outras máis adiantadas como facía no Sálvora. Na actualidade o míster, Juanvi Cameán, conta con 25 fichas sénior, e xa os utilizou a todos e incluso un xuvenil a maiores. Ningún dos xogadores disputou os 19 partidos, pero en 18 foi titular Iván Angueira; Yaki e Pichi disputaron os mesmos partidos, pero foron titulares 16 e 15 veces, respectivamente. Tamén 16 veces saíu de inicio o porteiro Couso e o medio Álex Gallego, unha vez máis que Estévez. Borja, Gonzalo, Juanito e Darío poderiamos dicir que serían os que completarían o once, con vantaxe sobre Fon, que participou tamén en 18 encontros, pero só dez de titular. Reparten titularidades e suplencias Jimmy, Álex Fariñas ou Jorge, mentres que Javi Merluzo e mesmo Miguel é habitual que saían desde o banco. Menos minutos suman os Hugo, Sergio, Andrés, Flori, Xenxo, Carlos ou o xuvenil Julio.

Na actualidade ocupa o 5º posto, con 34 puntos, logrados mediante dez vitorias (Dumbría 0-2, Baio 2-0, Bertamiráns 1-2, Bastavales 1-2, Lalín 1-0, Tordoia 2-0, Cordeiro 1-2, Chaián 0-3, Praíña 1-0 e Dumbría 2-1) e catro empates (na casa, Val do Ulla 2-2, Esteirana 2-2 e Unión 0-0; fóra, Piloño 2-2), e perdeu cinco partidos (Piloño 0-4, Sigüeiro 2-0, Fisterra 3-1, Flavia 1-2 e Soneira 5-2). Os seus puntos foron practicamente conseguidos tanto no seu campo como fóra, pois na casa leva 18 e fóra 16, disputando un encontro máis como local. Hai que destacar que das cinco derrotas tres foron cos tres primeiros e as outras dúas con equipos que poderían estar aí arriba. Como visitante marcou 16 goles e encaixou 15, e en tan só un deles -en Sigüeiro- non logrou marcar. Acumula na actualidade sete xornadas sen perder (5 vitorias e 2 empates), o que fixo que estea loitando co Baio pola cuarta praza. O seu máximo goleador é Darío, con 7 goles, seguido de Juanito e Pichy, con 3; levan 2 Fon, Abel, Javi Merluzo, Gonzalo e Álex Fariñas, mentres que con 1 están Estévez, Jimmy, Jorge, Flori, Hugo e Julio.

PRIMEIRA GALICIA – GRUPO 2

C.D. BAIO – S.D. ESCLAVITUD

Domingo 27 de xaneiro; 16:15 horas.

Campo: Platas Reinoso (Baio).

Árbitro: Denís Añón Salgueiro.

Asistentes: Brian Agüero Seoane / Aitor Escourido Álvarez.