Previa: CD Baio-CF Dumbría

A Historia

O CD Baio vai debutar esta temporada no Platas Reinoso recibindo a un equipo da Costa, o CF Dumbría. E, por incrible que pareza, esta vai ser a primeira vez que estes dous equipos se enfronten en partido de liga. Si o fixeron na Copa da Costa (en dúas eliminatorias, unha delas a final da temporada 2004-05), e tamén se enfrontou o Baio ao filial Dumbría B, pero nas 23 temporadas que leva competindo o club dumbriés non cadraron nunca. O CF Dumbría fundouse en 1996, e as catro primeiras campañas disputou a 3ª Rexional, para ascender á Liga da Costa logo da 1999-2000. Boas campañas na liga costeira do Dumbría pero non foi ata a 2005-06 cando se proclamou campión e ascendeu á 1ª Autonómica provincial. Cinco campañas estivo nesta categoría, ata que o subcampionato da temporada 2010-11 lle valeron o ascenso á Preferente. Outros cinco anos estivo nesta categoría ata que descendeu á 1ª Autonómica, logo da 2015-16. Pero só estivo unha campaña neste grupo semiprovincial, pois o título ligueiro valeulle para ascender de novo á Preferente. Pero a nova experiencia na Preferente tan só durou unha temporada, e descendeu outra vez para esta 1ª Galicia semiprovincial. En total, son 6 temporadas na Preferente, 4 na 3ª Rexional, 6 na 2ª Rexional e esta é a 7ª na 1ª. As súas vitrinas teñen dous campionatos ligueiros: a Liga da Costa (2005-06) e o da 1ª Autonómica (2016-17); pero no que si conseguiu grandes éxitos foi na Copa da Costa, con catro títulos (2000-01, 2004-05, 2009-10 e 2013-14), e dúas finais perdidas (2011-12 e 2016-17).

O partido do domingo

O CF Dumbría descendeu da Preferente e vive unha nova campaña na 1ª Galicia coa intención de apostar pola idea de darlle saída aos xogadores que desde o xuvenil da Liga Galega van saíndo. Unha ampla renovación no plantel, que empeza no banco coa volta de Julián Ferreiro, que ascendera o equipo hai dous anos. Tan só quedan 10 xogadores do equipo da temporada anterior, con baixas significativas, sobre todo as que se foron para o Fisterra (Iván Bouzón, Aarón, Julio e Adrián Makkay), que se unen ás de Pesco, Iván González, Esteban Capelo ou Raúl Lestón. As altas chegaron de xente procedente de equipos xuvenís: do Bergantiños chegaron Alberto Loureiro e Marcos Mouro, e do propio Dumbría subiron Jorge, Eloy, Pablo Paz, Borja e Xabi. Xunto a eles viñeron catro caras novas, o porteiro Iván Baña (Dubra), os centrocampistas David García (Mazaricos) e Darío Capelo (Negreira) e desde o Cee retornou o dianteiro Charly. Dos que permaneceron destacan os veteranos Iago (mariscal xeneral do equipo), David Carreira, Sergio ou Matías, que van marcar a liña a seguir polos máis novos, nos que podemos incluír grandes xogadores que continúan como Diego Cespón, Rivi, Marcote ou Kanario.

Tras a sorprendente derrota na primeira xornada no Conco ante o ascendido Esclavitud, intentará empezar a sumar na súa visita ao Platas Reinoso. Enfronte terá un CD Baio que sumou a súa primeira vitoria en terras teenses, e quererá celebrar ante o seu público as festas cun novo triunfo. E ademais terá o especial engadido de dedicarlles a vitoria a tres grandes do club que se retiraron a pasada temporada e que van recibir unha homenaxe na previa do partido. MARIO, MARTÍN e RAMÓN ben merecida que a teñen.

PRIMEIRA GALICIA – GRUPO 2

C.D. BAIO – C.F. DUMBRÍA

Domingo 9 de setembro; 18:30 horas.

Campo: Platas Reinoso (Baio).

Árbitro: Ángel Acuña Piñeiro

Asistentes: Héctor Pérez Álvarez / Brais Núñez Guerreiro