Previa CD Baio-CD Unión

A Historia

O CD Baio vai recibir no Platas Reinoso, na última xornada do Grupo 2 da Primeira Galicia, ao CD Unión de Asados. O equipo rianxeiro, fundado en 1969, disputa coa actual a súa 48ª temporada, logo de que se retirase na 1996-97. Tras once anos na Liga do Sar, ascende á 1ª Rexional na 1981-82, na que vai botar cinco temporadas, cumpridas elas ascende á Preferente, na que botará dúas campañas. Descende á 1ª Rexional na que se encadraba a Liga do Sar, na que está tres campañas para continuar na 1ª Rexional provincial as dúas seguintes. Descende á Liga do Sar e tras tres campañas baixa á 3ª Rexional, pero o club retírase nesa 1996-97. Volve competir na temporada 1997-98 na 3ª Rexional, e tras tres temporadas volve á Liga do Sar para a 2000-01, campaña na que queda campión, pero renuncia ao ascenso. Logo de tres temporadas máis, volve quedar campión na 2003-04 e agora si ascende á 1ª Rexional provincial. Cinco campañas botará nesta categoría para descender de novo á Liga do Sar, pero pouco duraría aquí pois proclámase campión nesa 2009-10 e regresa á 1ª Autonómica, e pouco duraría aquí porque acto seguido sobe á Preferente. A súa estancia aquí foi cousa dun ano, e volveu á 1ª Autonómica semiprovincial, na que acumula seis campañas consecutivas. Xa que logo, nesas 48 temporadas disputou tres ligas da 3ª Rexional, 23 da Liga do Sar, 3 da Preferente e esta é a súa 19ª campaña na 1ª Rexional. Nestes anos acumula 3 Ligas do Sar (2000-01, 2003-04 e 2009-10) e 1 Liga da 1ª Rexional semiprovincial (1985-86); así como 2 Copas do Sar (1974-75 e 1999-2000), sendo finalista tamén na 2007-08.

Esta é a novena temporada na que coinciden os dous conxuntos, as tres primeiras na Rexional Preferente e as demais na 1ª Rexional. O primeiro enfrontamento foi o 16 de outubro de 1983, no Balsiño, con vitoria local por 3-2. Volveron cadrar na mesma categoría na temporada 1986-87 e desta volta os rianxeiros lograron vencer (0-1), pero os baieses tomaron o desquite na campaña seguinte (2-1). A seguinte confrontación foi no novo século, na temporada 2004-05, na 1ª Rexional provincial, e o partido acabou en empate. Repetiron na campaña 2005-06 e o Baio impúxose pola mínima (1-0). As tres últimas confrontacións no Platas Reinoso foron na 1ª Autonómica semiprovincial e nelas impúxose sempre o equipo de Asados: na 2013-14 venceron por 1-2, e na 2014-15 e 2015-16 golearon polo mesmo marcador (0-4). Polo tanto, lixeira vantaxe para o Unión nos partidos xogados en Baio, mentres que nas estatísticas xerais a vantaxe é maior.

O partido do domingo

O CD Unión realizou unha gran temporada e mantívose todo o ano nos postos altos, ocupando na actualidade o 5º posto, con 61 puntos. 18 vitorias, 7 empates e 8 derrotas son os números que leva ata o momento, cunha regularidade manifesta. Dos 17 partidos xogados como local sumou 32 puntos, e nos 16 como visitante leva 29; fixo 33 puntos na primeira volta e leva 28 na segunda. Como visitante logrou nove vitorias (Agolada, Fisterra, Silleda, Flavia, Tordoia, Cordeiro, At. Ribeira, Sigüeiro e Bertamiráns), 2 empates (Piloño e Bastavales) e cinco derrotas (Lalín, San Lorenzo, Puebla, Soneira e Chaián).

No que vai de temporada o adestrador Óscar Suárez Pimentel, Pimen, utilizou 20 xogadores sénior -aínda que catro foron baixa ao longo da campaña- e 5 xuvenís. Na actualidade ten 16 fichas sénior, e 14 deles repártense principlamente no equipo titular, o que dá mostra da igualdade do plantel. Tan só un xogador participou nos 33 partidos: o dianteiro Saviola (28 como titular), mentres que tres xogadores faltaron a dous partidos: o porteiro Eloy, o xuvenil Jorge (21 como titular) e o dianteiro Juanma (23 titularidades). Despois de Eloy, os que máis veces foron titulares son o propio Saviola e Óscar Galván, con 28, seguidos de Óscar Blanco, con 26, e Cristian, con 25. Tamén pasan de 20 titularidades Álex Conde, Juanma, Jorge, Bebeto e Xabier; mentres que teñen menos titularidades Chicho, Borja, Pablo Reboiras, Néstor e Mauro. Rebollido sae habitualmente do banco, e Manu Vigo é o menos utilizado dos xogadores sénior. O Unión marcou ata o momento 59 goles, o que o converten no 3º máis goleador do grupo, dos cales 30 foron logrados como visitante; mentres que encaixou 39 goles -o 4º menos goleado empatado co Baio-, dos que dous terzos foron como visitante -26-. O seu máximo goleador é Saviola, con 14 goles, seguido de Juanma con 12; Néstor leva 6, e con 5 están Chicho e Bebeto, ata completar os 13 xogadores que lograron marcar.

PRIMEIRA GALICIA – GRUPO 2

C.D. BAIO – C.D. UNIÓN

Domingo 20 de maio; 18:00 horas.

Campo: Platas Reinoso (Baio).

Árbitro: Ángel Acuña Piñeiro

Asistentes: Carlos Martínez Rodríguez / Daniel Naya Rey