Previa Bastavales UD-CD Baio

A Historia

O domingo o CD Baio viaxa ata Brión para enfrontarse ao Bastavales UD, club que alcanzou hai dúas temporadas o seu teito ascendendo á 1ª Galicia tras proclamarse campión do seu grupo da 2ª Galicia na 2016-17. Non tivo o mesmo éxito na Copa do Sar, na que foi subcampión esa mesma temporada (perdeu co Piloño SD), como xa o fora na 1977-78 (caeu co Padrón SD).

Esta é a segunda temporada que coinciden Bastavales e Baio, tras coñecerse por vez primeira a campaña pasada. O 29 de outubro enfrontáronse no Campo Municipal de Brión, e o partido rematou en empate (1-1), mentres que no da segunda volta en Baio impuxéronse os locais (2-0). Esta campaña tocoulles xogar primeiro no Platas Reinoso e o conxunto brionés levou un punto ao empatar 1-1.

O partido do domingo

O Bastavales UD, tras ser o equipo revelación da campaña pasada, está pasando un mal ano, pois non logrou endereitar o rumbo e non dá saído dos postos baixos da clasificación. A pesar de contar con boa parte do plantel da temporada anterior (ata 18 xogadores seguiron no club), o equipo non logrou os mesmos resultados. Iso si, tivo baixas importantes como as dos seus dianteiros Adrián Pereira e Adrián Beiroa, así como o adestrador que os levara da 3ª Galicia á 1ª, como era Pika. Esta temporada confiaron o labor técnico en Álex Romero, que o ano pasado gañara a Liga da Costa coa Esteirana, pero as cousas non foron ben e foi substituído por Manuel Pereiro Turrisi, que este ano xa iniciara a liga co Chaián CF. Actualmente conta o equipo con 23 fichas sénior, logo de dúas baixas: Eloy Campos (Outes) e Roberto Prendes, que se compensaron con outras chegadas xa iniciada a temporada como Jacobo Estévez e Brais Otero (Bertamiráns) ou a recente de Picallos (Belvís). Os dous adestradores usaron ata o momento 31 xogadores, 7 deles xuvenís, sen que ningún deles participase en todos os partidos. Ao dianteiro Julián Nieto faltoulle un, pois foi titular 23 veces e unha suplente; xunto a el Richi, Emilio Mariño, Baliño, Álex Vila e Xaco son habitualmente da partida. Outros que saíron moitas veces no once son o xuvenil Gabriel Mirazo, Viti, Fran García, Laba e David Mirazo, repartíndose practicamente a titularidade os porteiros David Insua e Minifonti. Menos partidos xogou Raúl Insua, Óscar Feijoo, Villaverde, Óscar Rodríguez ou Jacobo Estévez. Desde o banco adoitan saír Farrah, Miguel Castro, Luis Rey, Brais ou Mintes.

Na actualidade ocupa o 17º posto, con 22 puntos, logrados mediante seis vitorias (Unión 2-1, Chaián 1-2, Val do Ulla 1-3, Piloño 2-1, Chaián 2-0 e Dumbría 2-0) e catro empates (na casa, Bertamiráns 1-1, Lalín 0-0 e Cordeiro 1-1; fóra, Baio 1-1), e perdeu quince partidos (Soneira 1-0, Tordoia 1-4, Cordeiro 2-0, Praíña 2-3, Dumbría 2-1, Esclavitud 1-2, Sigüeiro 2-4, Esteirana 4-1, Fisterra 3-0, Flavia 1-3, Soneira 0-3, Tordoia 3-2, Unión 3-1, Praíña 2-1 e Esclavitud 2-0). Sete xornadas seguidas sen vencer afundírono na táboa, e agora polo menos gañou os seus dous últimos partidos como local, que o manteñen a tiro de pedra da salvación. Como local conseguiu 15 dos 22 puntos que ten, marcando na casa a maioría dos seus goles (17 de 29), e encaixando 23 do 48, cifra esta que os coloca como o terceiro máis goleado do grupo. O seu máximo goleador é Julián Nieto, con 8 goles, seguido xa lonxe por Laba e Richi, con 3. Levan dous Baliño, eloy Campos, Raúl Insua, Farrah e Villaverde, mentres que con un están Emilio, Xaco, Viti, David Mirazo e Brais.

PRIMEIRA GALICIA – GRUPO 2

BASTAVALES U.D. – C.D. BAIO

Domingo 17 de marzo; 17:00 horas.

Saída de Baio ás 15:00 horas.

Campo: Municipal de Brión (Brión).

Árbitro: Daniel Val Castro.

Asistentes: José Luis Miguélez Granja / Bruno Iglesias Penela.