O que queda, que non é pouco!!!

Esta semana púxose ao día a competición do Grupo 2 da 1ª Galicia, coa disputa dos dous partidos suspendidos no seu día polo temporal. O pasado xoves un interesante duelo entre dous dos favoritos ao título de liga, entre o Puebla e o Agolada, que se resolveu de lado local grazas a dous goles de Changui no segundo tempo, un deles olímpico, para Álex Diéguez igualar a golaveraxe particular co seu gol nos minutos finais. E este domingo o Bastavales impúxose con dificultades a un combativo Tordoia, que viu como os locais se adiantaban con dous goles de Pereira e Viti, pero un penalti transformado por Liñares antes do descanso, dáballe emoción ao segundo tempo. Neste un rebumbio na área local trouxo o empate de Dubra, pero axiña reaccionaron os locais e Mirazo de cabeza puxo o definitivo 3-2; curiosamente os dous últimos goleadores serían expulsados pouco despois. Con estes marcadores o Puebla e o Bastavales achéganse perigosamente ao Piloño e Agolada e poñen moita emoción ao tramo final da liga.

Pola súa parte, pola parte baixa o Tordoia segue no posto de arrastre, con dous de vantaxe sobre o At. Ribeira e San Lorenzo, e a catro do seguinte na táboa, o CD Baio. Aquí vos deixamos o que nos queda de liga pola parte baixa e pola parte alta para que vaiades botando as vosas contas, pero lembrade que as contas da feira nunca coinciden coas do mercado. En primeiro lugar, o calendario do CD Baio, que este vindeiro domingo recibe no Platas Reinoso ao Cordeiro CF.

Os demais equipos implicados no descenso teñen o seguinte calendario, descartando xa o Silleda CF, que con 16 puntos ten moi complicado saír desa situación:

E xa postos, imos analizar a loita polo título e a promoción de ascenso entre os seis principais candidatos, que teñen este calendario:

A vindeira semana impresionante xornada con dobre enfrontamento entre os implicados na parte alta. No Hospitalillo os dous primeiros dirimirán a loita polo liderato, cun SD Agolada que vén de tres derrotas consecutivas, e un SD Piloño que tampouco gañou nas dúas últimas xornadas. E na Alta, o Puebla CF, que acumula 16 xornadas sen perder recibe á revelación do grupo, a UD Bastavales, que quere prolongar o seu soño. Os outsiders Flavia e Unión poden aproveitarse dos resultados dos catro primeiros para achegarse a eles se vencen nos seus partidos contra os dous últimos da clasificación, San Lorenzo e Silleda, respectivamente.