Previa: CD Baio-CF Silleda

A Historia

O CD Baio vaise enfrontar na decimosexta xornada da Primeira Galicia ao CF Silleda, despois da suspensión do partido da semana pasada en Ribeira polo temporal. O equipo silledense é un vello coñecido, pois estaba na 1ª Rexional cando o CD Baio ascendeu por vez primeira a esta categoría. Pasaron 35 temporadas desde aquela, nas que o Silleda se mantivo na 1ª Rexional Grupo 2 ata que este foi dividido en dous na campaña 1968-87, polo que continuou no grupo 2A, que corresponde á Liga do Sar. Catro anos neste grupo ata que descende á 2ª Rexional; na 1991-92 reestablécense as categorías e a Liga do Sar volve á 2ª Rexional, na que vai continuar o club silledense. Cinco temporadas continuas ata que descende á 3ª Rexional logo da 1995-96; na 1996-97 gaña a liga da 3ª Rexional e volve á Liga do Sar, na que estará catro temporadas ata que volve descender á 3ª Rexional; outra vez bota un ano no inferno e logra o ascenso ao ser campión. Tras catro campañas seguidas na última gaña a Liga do Sar e ascende á 1ª Rexional provincial, na que se aguantará tres anos, antes de volver á Liga do Sar. Dúas temporadas nela e volve descender á 3ª Autonómica, que novamente gaña nada máis baixar; tras unha campaña de asentamento á seguinte proclámase campión da Liga do Sar e ascende á 1ª Autonómica semiprovincial. Un só ano nesta categoría e descenso de categoría, para gañar de novo a Liga do Sar á campaña seguinte, e novo ascenso á 1ª Autonómica, na que cumpre a segunda temporada consecutiva. En definitiva, foron 9 temporadas na 1ª Rexional provincial ou semiprovincial, 22 na Liga do Sar e 4 na 3ª Rexional. Neste tempo conseguiu 3 Ligas do Sar (2005-06, 2013-14 e 2015-16) e 3 ligas da 3ª Rexional (1996-97, 2001-02 e 2011-12).

Esta será a terceira temporada na que coincidan os dous conxuntos. Como dixemos, a primeira foi na temporada 1983-84 e a segunda ocorreu na temporada 2014-15, ambas e dúas na 1ª Rexional semiprovincial. O primeiro enfrontamento foi o 23 de outubro de 1983 en Silleda, con vitoria local (2-0), mentres que o primeiro partido en Baio tivo lugar o 18 de marzo de 1984, no Balsiño, con empate sen goles. A seguinte visita dos silledenses a terras baiesas ocorreu hai tres temporadas, e o Baio venceu no Platas Reinoso por 3-1, vitoria que repetiría na súa visita ao Outeiriño. Polo tanto, as curtas estatísticas son favorables ao Baio.

O partido do domingo

Por segunda temporada consecutiva o CF Silleda compite na 1ª Galicia Grupo 2, no que a temporada pasada mantivo unha boa liña e rematou na zona media. Esta temporada sufriu unha forte renovación con moitas baixas no seu cadro de xogadores, sen apenas reforzos de fóra, completando o equipo coa subida de xogadores do filial que a temporada pasada competiu na 3ª Autonómica. As fichaxes redúcense á chegada desde o Lamela do porteiro Marcos e do medio Míchel, e desde o Compostela veu o seu xogador estrela, o centrocampista Martín González, moitos anos na 3ª División en equipos como o Cerceda. O conxunto dirixido por Iño conta con 22 fichas sénior, aos que se une algún que outro xuvenil nas convocatorias.

Nas catorce xornadas disputadas a base do equipo estivo formado pola presenza no once inicial de Lázara na portería (aínda que chegaron a xogar tamén Marcos e Cristian); quedando os demais postos case asegurados para Alan, Asier, Álex, Gus, Michel, Martín González, Manu, Richi, Rubén Fernández e Pablo Nogueira, aínda que tamén foron varias veces da partida Souto e Vilas. O resto aproveitan os minutos ou as baixas, e así contaron con oportunidades Esteban, Fondevila, Diego, Pablo Fernández, e sobre todo os xuvenís Moha e Iván Varela.

O Silleda ocupa na actualidade a 16ª posición do grupo, con 12 puntos, conseguidos tras tres vitorias e tres empates. Como local venceu ao Fisterra e ao Sigüeiro, e perdeu con Lalín, Piloño, San Lorenzo, Unión e Flavia; mentres que como visitante gañou en Bastavales, empatou co Puebla, Cordeiro e Bertamiráns, e perdeu co Soneira, Ribeira e Chaián. Polo tanto, leva os mesmos puntos na casa coma fóra. Conseguiu unha boa cantidade de goles, 22, mentres que encaixou 28. Son os seus goleadores Rubén Fernández, con 7 goles, Richi con 5, Martín González con 3, Pablo Nogueira con 2, e con 1 están Alan, Álex, Fondevila, Gus e Manu.

PRIMEIRA GALICIA – GRUPO 2

C.D. BAIO – C.F. SILLEDA

Domingo 17 de decembro; 16:00 horas.

Campo: Platas Reinoso (Baio).

Árbitro: Alexandre Represas Rodríguez

Asistentes: Brian Agüero Seoane / Santiago Lobón Martínez